Universitetlərlə əməkdaşlıq

İş dünyasının və biznes mühitinin inkişaf etməsində universitetlərlə və ali təhsil ocaqları ilə sıx əməkdaşlıq platformunun formalaşdırılmasının zəruriliyini dərk edən ATİB ötən illər ərzində həm Azərbaycan, həm də Türkiyənin ali təhsil müəssisələri ilə yaxın əməkdaşlıq əlaqələri qurmuşdur.

8 iyun 2006-cı ildə ATİB ilə Azərbaycan Memarlıq və İnşaat Universiteti (AMİU) arasında imzalanmış əməkdaşlıq memorandumunu buna misal göstərmək olar. Memorandumun 2.5 maddəsinin "Mütəxəssis hazırlığında istehsalatın tələblərinin tədris prosesində nəzərə alınması" müddəasına əsasən, AMİU-nin tələbələrinin təşəbbüskarlığının və istehsalat praktikasına olan həvəslərinin daha da artırılması məqsədi ilə ATİB “Ən Yaxşı Avtopark Layihəsi” mövzusunda müsabiqə elan etmişdir. Müsabiqənin mövzusu əhalisinin sayı getdikcə artmaqda olan Bakı şəhərinin qlobal problemlərindən sayılan “Müasir Standartlara Uyğun Avtopark”dır.

27 noyabr 2007-ci ildə Azərbaycan Memarlıq və İnşaat Universitetində keçirilən tədbir zamanı qaliblərə AMİU rektoru Gülçöhrə Məmmədova və ATİB İdarə Heyətinin Sədri Ahmet Erentok tərəfindən birinci yerin sahibinə 1000 manat, ikinci yerin sahibinə 500 manat, üçüncü yerin sahibinə isə 250 manat dəyərində pul mükafatları təqdim edilmişdir.

Ötən illər ərzində Azərbaycanın Memarlıq və İnşaat Universiteti (AMİU), Xəzər Universiteti, Türkiyənin Bilkent Universiteti, Selcuk Universiteti, Bahçeşehir Universiteti, Orta Doğu Teknik Universiteti, Şimali Kiprin Doğu Akdeniz Universiteti, Yakın Doğu Universiteti, Rusiyanın Müasir Humanitar Akademiyası, ABŞ-ın Con Hopkins Universiteti ilə müvafiq əlaqələr qurulmuş və inkişaf etdirilmişdir.

ATİB ümid edir ki, universitetlərlə əməkdaşlıq çərçivəsində Azərbaycan və Türkiyə də daxil olmaqla regionda insan resurslarının inkişafına öz töhfəsini verə biləcəkdir. ATİB bu çərçivədə digər ali təhsil müəssisələri ilə də əməkdaşlıq etməkdə maraqlıdır və müvafiq təklifləri nəzərdən keçirməyə hazırdır.

ATİB Azərbaycan, Türkiyə və Rusiyanın təhsil sistemlərini inteqrasiya edir

             Azərbaycan Türkiyə İş Adamları Birliyi missiyasına uyğun olaraq ölkələr arasında iqtisadi əlaqələrin inkişaf etdirilməsi ilə yanaşı, informasiya texnologiyalarının inkişafına da xüsusi əhəmiyyət verməkdədir. Qeyd etmək yerinə düşər ki, yarandığı gündən ATİB təhsil sektorunun inkişafı və informasiya cəmiyyətinin formalaşması istiqamətində bir sıra əhəmiyyətli layihələr həyata keçirib.

           ATİB Azərbaycan iqtisadiyyatının inkişafının insan resurslarının inkişafı ilə birbaşa bağlı olduğuna inanır və bu baxımdan insan resurslarının hazırlanması və inkişaf etdirilməsini Azərbaycan cəmiyyətinin, o cümlədən iş adamlarının qarşısında duran əsas vəzifələrdən biri hesab edir. Bu vəzifədən çıxış edərək ATİB Türkiyə-Azərbaycan-Rusiya (TAR) konsepsiyası çərçivəsində Türkiyə, Azərbaycan və Rusiya arasında hərtərəfli əlaqələrin inkişaf etdirilməsini, eləcə də Türkiyə və Rusiyada qabaqcıl təhsil təcrübələrinin həyata keçirilməsini nəzərdə tutur.

           ATİB-in təşəbbüsü və təsisçiliyi ilə Azərbaycan və Rusiya arasında humanitar sahədə dövlətlərarası əməkdaşlıq proqramına müvafiq olaraq 2008-ci ildə yaradılan İnnovasiya İnstitutu ölkədə məsafədən təhsil imkanlarını təklif edən ilk qurumlardan biridir. Qurumun təsis edilməsində məqsəd Azərbaycanda təhsilin keyfiyyətinin yüksəldilməsinə dəstək verilməsi və iqtisadiyyatının müxtəlif sahələri və birgə müəssisələr üçün mütəxəssis hazırlanmasıdır. Hazırda İnnovasiya İnstitutu Anadolu Universiteti də daxil olmaqla, Müasir Humanitar Akademiya (Rusiya), Qlobal Açıq Universitet (ABŞ) və digər təhsil müəssisələri ilə əməkdaşlıq edir.

            Bu çərçivədə ATİB-in koordinatorluğu ilə Türkiyənin Anadolu Universiteti nümayəndə heyətinin Moskvaya səfəri təşkil edilib. Anadolu Universitetinin rektoru prof. dr. Davud Aydının rəhbərlik etdiyi 16 nəfərdən ibarət heyət Moskva Müasir Humanitar Akademiya ilə əməkdaşlıq etmək məqsədilə 30 iyun-6 iyul tarixlərində Moskvada işgüzar səfərdə olub. Səfər çərçivəsində adıçəkilən heyət Türkiyənin Rusiyadakı səfiri Halil Akıncı, Rusiya Dövlət Dumasının Elm və təhsil məsələləri üzrə komitəsinin sədri Oleq Smolin, Rusiya Federasiya Şurasının üzvü Hüseyn Çeçenov və Müasir Moskva Humanitar Akademiyasının səlahiyyətliləri ilə müxtəlif görüşlər keçirib.

            1 iyul 2010-cu ildə Anadolu Universitetinin rektoru prof. dr. Davud Aydın Müasir Moskva Humanitar Akademiyasının qurucusu prof. dr. Mixail Karpenko, Azərbaycan Türkiyə İş Adamları Birliyinin təsisçisi olduğu Bakı İnnovasiya İnstitutunun rektoru prof. dr. Fərhad Mehdiyev, ATİB İdarə Heyəti sədrinin birinci müavini və Dünya Türk İş Adamları Təşkilatının Avrasiya İş Adamları Şurasının sədri Cemal Yangından ibarət birinci heyət Türkiyə Respublikasının Rusiya Respublikasındakı səfiri Halil Akıncını ziyarət edib. Bu görüşlərin iki ölkə arasındakı dostluq əlaqələrinin möhkəmləndirilməsi baxımından əhəmiyyətli olduğunu bildirən H.Akıncı universitetlər arasındakı əməkdaşlığa dövlətin tam dəstək verəcəyi fikrini də səsləndirib.

            Eyni gündə rektor müavini prof. dr. Meryem Akoğlan Kozakın rəhbərliyi altında hüquq fakültəsinin dekanı prof. dr. Nüvit Gerek, rabitə və IT fakültəsi dekanı prof. dr. Nejdet Atabek, qiyabi fakültə təmsilçisi prof. dr. Kamil Çekerol və digərlərindən ibarət ikinci heyət isə Müasir Moskva Humanitar Akademiyasının distant təhsil sistemi ilə tanış olmaq məqsədilə universitetin Moskva binasını ziyarət edib.

            1 iyul 2010-cu ildə Anadolu Universitetinin hər iki heyəti və Müasir Moskva Humanitar Akademiyasının bütün səlahiyyətli nümayəndələri arasında görüş keçirilib. Prof. dr. Aydın Ziya Özgür qiyabi fakültə və burada tətbiq olunan açıq və məsafədən təhsil sistemi haqqında detallı təqdimatla çıxış edib.

            2 iyul 2010-cu ildə birinci heyət Rusiya Dumasının millət vəkili, elm və təhsil məsələləri üzrə komitə sədri Oleq Smolini ziyarəti edən zaman Türkiyə ilə Rusiya arasındakı əlaqələr, təhsil sahəsində əməkdaşlıq məsələləri haqqında fikir mübadiləsi aparılıb. Görüşdə, həmçinin, iki ölkə arasındakı əməkdaşlıqda yüksək texnologiyalardan istifadə, hər iki universitetin sayəsində təhsilin beynəlxalq səviyyəyə yüksəlməsi, məsafədən təhsilin keyfiyyətinin yüksəldilməsi, əməkdaşlıq haqqında Rusiya Federasiyasının Prezidenti Dmitri Medvedevin məlumatlandırılması və s. məsələlərdən söz açılıb.

            2 iyul 2010-cu ildə eyni heyət Rusiya Federasiya Şurasının Təhsil və Elm Şurasının sədri  Hüseyn Çeçenov tərəfindən qəbul edilib. Bu görüşdə əməkdaşlığa dərhal başlamağın zəruriliyi, Orta Asiya ilə strateji əməkdaşlığın qurulması və sertifikat proqramlarının açılması, televiziyadan effektiv istifadənin zəruriliyi və s. məsələlər müzakirə olunub.

            Həmin gün Rusiya Humanitar Akademiyasında baş tutan toplantıda hər iki universitetin nümayəndələri həyata keçirdikləri distant təhsil proqramları haqqında məlumat verib və əməkdaşlıq məsələlərini müzakirə ediblər. Görüş iştirakçılarına Müasir Moskva Humanitar Akademiyasının təxminən 165.000 tələbəyə təhsil verməsi, Global Mega University Network-a daxil olan yeganə rus universiteti olması, kredit sistemi olaraq Avropa Kredit Transfer Sistemini tətbiq etməsi və s. haqqında məlumat verilib.

            3-4 iyul 2010-cu ildə Müasir Moskva Humanitar Akademiyasına məxsus Soçi binasında keçirilən görüşlərdə universitetlər arasında protokol imzalanması ilə bağlı ilkin hazırlıq işləri görülüb, qonaqlara peyk vasitəsilə məlumatın ötürülməsi və təhsil televiziyası ilə bağlı ətraflı məlumat verilib.

            5 iyul 2010-cu ildə adıçəkilən universitetlər arasında əməkdaşlıq protokolları imzalanıb. Tədbirdə prof. dr. Mixail Karpenko və rektor prof. dr. Tarakanov tərəfindən prof. dr. Davud Aydına fəxri professor adının verilməsi ilə bağlı qərar səsləndirilib.

            Anadolu Universiteti ilə Moskva Humanitar Akademiyası arasında imzalanmış protokol qısa olaraq aşağıdakı maddələrdən ibarətdir: a) müəllim, mütəxəssis, texniki və administrativ işçi mübadiləsi; b) tələbə mübadiləsi; c) seminar və akademik toplantıların təşkili və iştirak; d) əyani, qiyabi və məsafədən təhsillə bağlı tədris materialı, ortaq proqram və proqramın tərkibinin təkmilləşdirilməsi, texniki və fiziki infrastruktur mübadiləsi; f) imtahanların təşkilində əməkdaşlıq; g) iki diplom proqramlarının açılması; h) ortaq fəaliyyətləri həyata keçirmək və/və ya araşdırma mərkəzləri açmaq; i) Beynəlxalq Qiyabi və Distant Təhsil Birliyinin yaradılması.

            Qeyd edək ki, anlaşma hər iki universitetin bütün mərkəzlərində həyata keçirilən bakalavr, magistr, doktorluq və sertifikat proqramlarını əhatə edir. Universitetlər bu sahələrdə təhsil və araşdırma fəaliyyətlərində əməkdaşlıq etməyə cəhd göstərəcəklər. İmkan daxilində hər iki universitetin müəllim heyəti, araşdırma qurumları və tələbələr arasında birbaşa əlaqə və əməkdaşlıq təşviq ediləcək.

            Bu protokol ümumi qərarları əhatə edir. Həyata keçiriləcək hər bir fəaliyyət üçün əlavə müqavilələr imzalanacaq. Buna görə də ilk növbədə Müasir Moskva Humanitar Akademiyasının 2010-cu ilin avqust ayında Anadolu Universitetini ziyarəti və müzakirələrin davam etidirlməsi planlaşdırılır.

            Toplantıların sonunda hər iki qurum rəhbərləri ilk növbədə Türkcə Sertifikat Proqramına bənzər Rusca Sertifikat Proqramının hazırlanmasına və 6-8 oktyabr 2010-cu ildə Anadolu Universitetində baş tutacaq IODL& ICEM 2010 adlı konfransda proqramlara rəsmi olaraq başlanılmasına qərar veriblər. Bu konfransa eyni zamanda Rusiya Federasiyası və Türkiyə Respublikasının yüksək səviyyəli nümayəndələrinin də dəvət edilməsi nəzərdə tutulur.